O Camiño de Inverno é a entrada natural a Galicia desde a meseta, un acceso xa usado polos romanos. Pénsase que puido xurdir como alternativa, na época invernal, á dura subida aos cumes nevados do Cebreiro. Arrinca desde Ponferrada e segue practicamente o curso natural do caudaloso río Sil pola comarca ourensá de Valdeorras. Logo discorre polo sur da provincia de Lugo, continúa pola comarca do Deza, ata chegar a Bendoiro (Lalín) -onde se atopa coa Vía da Prata, a cal ten a súa orixe en distintas calzadas.
